Posted On : Feb 16 2010 Tuesday 08:18:36 AM | Views : 195
गायक रोज मोक्तानले न्युयोर्कस्थित ढाका क्लबमा 'हिउँ पर्‍यो फुरुरु मैच्याङ...' गाउँदै गर्दा बाहिर साँच्चिकै हिउँ फुस्फुसाइरहेको थियो । अमेरिकाका विभिन्न राज्य र क्यानाडादेखि सोनाम ल्होछार मनाउन भेला भएका आप्रवासी तामाङ समुदायमाझ यसपछि रोजले 'कलकत्ते काईंयो...,' 'हेलम्बुको बजारमा, माया बस्यो याङजीको नजरमा...,' सोलुकी मैच्याङ के सारो राम्री...' लगायत एक दर्जन गीत पस्के । उनलाई साथ दिँदै थिए अर्का गायक प्रेम लोप्चन, अमृत लामा र अमेरिकामै बसोबास गरिरहेका संजोग योन्जन र गोमा योन्जनले । झाँक्री नृत्य, लामा नाच, तामाङ खानपिन र वेशभूषा तथा कला प्रदर्शनीसमेत गरिएको ल्होछार महोत्सव तामाङ

सोसाइटी अफ अमेरिकाले आयोजना गरेको थियो । प्रेम लोप्चनले 'यो मैच्याङको रूपै मोहनी...,' 'भीमफेदी गाउँदै आउँदामा...,' 'कोदोको ढिँडो नाका ल स्या...,' 'चरिकोट दोलखा म जाँदा...' मात्रै गाएनन्, झाँक्री नृत्यसमेत गरे । 'नेपाली कलासंस्कृति र परम्परा फैलाउन' तामाङ सोसाइटीका अध्यक्ष इन्द्र तामाङले न्युयोर्कबाट कान्तिपुरलाई भने, 'हरेक वर्ष महोत्सव गर्दै आएका छौं ।'

उनका अनुसार अमेरिकाका विभिन्न राज्य र क्यानाडाका गरी महोत्सवमा झन्डै एक हजार सहभागी थिए । संयुक्त राष्ट्रसंघका राजदूत ज्ञानचन्द्र आचार्य, न्युयोर्कका काउन्सिलर डानियल ड्रोम, कन्ट्रोल जोन लिउले समेत ल्होछारको मज्जा लिए । 'प्रेम र रोजलाई काठमाडौं छँदा खुबै सुनिएको हो,' क्यानाडाको टोरन्टोबाट महोत्सवमा सहभागी भएका रामकाजी मोक्तानले भने, 'यहाँ सँगै

गाउँदै नाच्न पाउँदा बेग्लै अनुभूति भयो ।'